कुन्साङ काकालाई सम्झना छ एकताका माओ बीपीका पनि क्रान्ति निर्देशक थिए । कुरा एकतीस बत्तीस सालतिरको हो । हाम्रा काका उसबेला तनहुँमा मास्टरी गर्थे । कतिपय रैथाने काङ्ग्रेसीहरू उनका मित्र थिए जसले उनलाई खुसुक्क “तरुण” पढ्न दिन्थे । सत्ताको उत्पीडन चरमोत्कर्षमा पुग्दा र काङ्ग्रेसी रोषले उग्र रूप लिँदा बीपीले पञ्चायती सत्तालाई चुनौती दिँदै माओको कोटेसन उद्धृत गरेका थिए— राजनीतिक सत्ता बन्दुकको नालबाट हासिल हुन्छ । बीपीका भाई जीपी र उनका मित्रहरू बागी राजनीतिमा माओको यसै उद्धरणबाट समेत दीक्षित भएका हुन् । माओका कृतिहरूका प्रकाशक विजयराजहरू पक्राउ पर्ने हो भने ती कृतिबाट दीक्षित भएका जीपीहरूचाहिँ किन पक्राउ नपर्ने ? आज पजेरोपथका अनुगामी भए पनि उसबेला माधवकुमार नेपाल र वामदेव गौतमहरू माओको यही विद्रोही कथनबाट शिक्षित भएका हुन् । विजयराजहरू पक्राउ पर्ने हो भने सनातन एमाले माकुने महोदय र फिर्ती पोइले एमाले वादेर्गौँ साहेपचाहिँ किन पक्राउ नपर्ने ? अनि माओका राजनीतिक सूत्रहरू रटाएर बीपीले राजनीतिमा आँखा खोलिदिएका शेरबहादुर महोदयले आफ्नै आदेशमा आफैलाई पक्राउ किन नगर्ने ? लाठेहरूलाई छाडिदिनु र विजयराजहरूलाई पक्राउ गर्नु जो होचो उसैका मुखमा घोचो भएन र ?